मुंबई: लाडकी बहीण योजना आणि अन्नपूर्णा योजनेनंतर आता महाराष्ट्रातील शेतकऱ्यांसाठी एक नवीन योजना येणार आहे—लाडका शेतकरी योजना. या योजनेची घोषणा मुख्यमंत्री एकनाथ शिंदे यांनी कृषी महोत्सवात केली.
शिंदे यांनी आपल्या भाषणात सांगितले की, महायुती सरकार शेतकऱ्यांच्या कल्याणासाठी कटिबद्ध आहे. त्यांच्या मते, शेतकऱ्यांच्या पिकाला थेट मार्केट उपलब्ध करून देणे हेच सरकारचे मुख्य उद्दिष्ट आहे. “आम्ही पॅकेट देत नाही, आम्ही शेतकऱ्यांना थेट बाजारपेठ देण्याचे काम करत आहोत,” असे शिंदे म्हणाले.
सरकारच्या धोरणांमध्ये कष्टकरी, वारकरी आणि सुखी शेतकरी यांना अग्रक्रम देण्यात आला आहे. “लाडकी बहीण, अन्नपूर्णा, आणि लाडका भाऊ योजनेनंतर आता लाडका शेतकरी योजना आणण्याचा निर्णय घेतला आहे,” असे शिंदे यांनी जाहीर केले. त्यांनी पुढे असेही स्पष्ट केले की या योजनेद्वारे सर्व शेतकरी आता लाडके होतील, ज्यामुळे त्यांच्या जीवनात सुधारणा होईल.
लाडका शेतकरी योजना शेतकऱ्यांच्या हितासाठी कशाप्रकारे फायदेशीर ठरेल, याची अधिक माहिती येणाऱ्या काळात मिळण्याची शक्यता आहे.
